Peras ó viño tinto con queixo de Cebreiro
INGREDIENTES (para 6 persoas)
- 6 peras grandes ou unha ducia das pequenas
- 300 g de azucre (3 culleradas por pera)
- 1/2 litro de viño tinto
- canela, noz moscada en pó e 1 cravo de especia
- 1 grolo de licor de pera ou augardente
- 1 cullerada de queixo por persoa
- 6 Marrons Glacés
ELABORACIÓN
Pélanse as peras de tonas e co descorazonador quítaselle o carozo e as pevidas.
Poñémolas dereitas nun cazo sen cubrilas totalmente de viño, coas especias, para cocelas sen que fervan, a lume manso. De cocidas retirámolas da pota e deixamos reduci-lo prebe da cocción 10 minutos. Enfriamos as peras co prebe na neveira dúas horas. Partimos cada pera á metade e colocámolas no plato cortadas como se fosen láminas facendo un abano. Móllanse coa salsa de cocelas e cun grolo de licor, poñendo o queixo ó seu carón. Adobiamos con cereixas confitadas ou herbaboa picada cun marron glacé enriba do queixo.